વિરાટ કોહલી વર્તમાન સમયમાં વિશ્વનો મહાન ક્રિકેટર છે. કોહલી જ્યારે પણ મેદાન પર આવે છે ત્યારે કોઈને કોઈ રેકોર્ડ તેના નિશાના પર હોય છે. બાંગ્લાદેશ સામેની પ્રથમ ટેસ્ટ મેચમાં ભલે વિરાટ કોહલીનું બેટ કામ ન કરી શક્યું, પરંતુ તેણે બંને દાવમાં કુલ 23 રન બનાવ્યા છતાં ઈતિહાસ રચ્યો. વાસ્તવમાં, બીજી ઇનિંગમાં કોહલીએ 17 રન બનાવ્યા, જેના કારણે તેણે ઘરઆંગણે 12000 રન પૂરા કર્યા. આ સ્થાન હાંસલ કરનાર સચિન તેંડુલકર બાદ તે ભારત તરફથી બીજો બેટ્સમેન બન્યો છે. તેણે પોતાની 219મી મેચમાં આ રેકોર્ડ બનાવ્યો હતો.
કોહલી ભલે પ્રથમ ટેસ્ટમાં મોટી ઇનિંગ રમી શક્યો ન હતો, પરંતુ કાનપુરમાં રમાનારી બીજી ટેસ્ટમાં તેની નજર માત્ર મોટા સ્કોર પર જ નહીં પરંતુ ઘણા મોટા રેકોર્ડ્સ પર પણ હશે. વાસ્તવમાં વિરાટ કોહલીને કાનપુરના ગ્રીન પાર્ક સ્ટેડિયમમાં મોટી સફળતા હાંસલ કરવાની તક મળશે. જો તે બીજી ટેસ્ટમાં 129 રન બનાવવામાં સફળ થશે તો તે ટેસ્ટ ક્રિકેટમાં 9000 રન પૂરા કરશે. આવું કરનાર તે માત્ર ચોથો ભારતીય બેટ્સમેન હશે. આ પહેલા માત્ર સુનીલ ગાવસ્કર, સચિન તેંડુલકર અને રાહુલ દ્રવિડ જ આ આંકડાને સ્પર્શવામાં સફળ રહ્યા છે.
કોહલીના નિશાના પર સચિનનો રેકોર્ડ
આટલું જ નહીં બીજી ટેસ્ટમાં વિરાટ કોહલી આંતરરાષ્ટ્રીય ક્રિકેટમાં સચિન તેંડુલકરના મોટા રેકોર્ડ તોડવા પર પણ નજર રાખશે. તે આ રેકોર્ડથી માત્ર 35 રન દૂર છે. જો તે આ કરવામાં સફળ થાય છે તો તે આંતરરાષ્ટ્રીય ક્રિકેટમાં 600થી ઓછી ઇનિંગ્સમાં 27 હજાર રન બનાવનાર વિશ્વનો પ્રથમ ક્રિકેટર બની જશે. ટેસ્ટ ક્રિકેટના 147 વર્ષના ઈતિહાસમાં આ પ્રથમ વખત બનશે જ્યારે કોઈ ક્રિકેટર 600થી ઓછી ઈનિંગ્સમાં 27 હજાર રનના આંકડાને સ્પર્શ કરશે. હાલમાં સૌથી ઝડપી 27 હજાર રન બનાવવાનો રેકોર્ડ સચિન તેંડુલકરના નામે છે, જેણે 623 ઇનિંગ્સમાં આ સિદ્ધિ મેળવી હતી. કોહલીના નામે 593 ઇનિંગ્સમાં 26965 રન છે. અત્યાર સુધી વિશ્વભરમાંથી માત્ર ત્રણ બેટ્સમેન આંતરરાષ્ટ્રીય ક્રિકેટમાં 27 હજાર રન બનાવી શક્યા છે. જેમાં સચિન તેંડુલકર, શ્રીલંકાના કુમાર સંગાકારા અને રિકી પોન્ટિંગનો સમાવેશ થાય છે.
ડોન બ્રેડમેનનો રેકોર્ડ ખતરામાં
કોહલી પાસે કાનપુર ટેસ્ટમાં ડોન બ્રેડમેનને પણ પાછળ છોડવાની તક મળશે. જો કોહલી પ્રથમ ટેસ્ટ મેચમાં સદી ફટકારવામાં સફળ રહેશે તો તે ટેસ્ટ ક્રિકેટમાં સદી ફટકારવાના મામલે બ્રેડમેનને પાછળ છોડી દેશે. બ્રેડમેનના નામે ટેસ્ટમાં 29 સદી છે. સદી ફટકારતાની સાથે જ કોહલી ટેસ્ટમાં 30 સદી ફટકારી લેશે. કોહલી બીજી ટેસ્ટમાં 3 કેચ લઈને સચિન તેંડુલકરનો મોટો રેકોર્ડ તોડશે. સચિન તેંડુલકરે ટેસ્ટમાં 115 કેચ પકડ્યા છે જ્યારે વિરાટે 113 કેચ પકડ્યા છે. આ સિવાય કોહલી 7 ચોગ્ગા મારતાની સાથે જ ટેસ્ટમાં પોતાના 1000 ચોગ્ગા પૂરા કરી લેશે.