સુપ્રીમ કોર્ટની પાંચ જજોની બેન્ચ ઈલેક્ટોરલ બોન્ડ કેસની સુનાવણી કરશે, નક્કી કરવામાં આવી આ તારીખ

સુપ્રીમ કોર્ટે સોમવારે રાજકીય પક્ષોને દાન સંબંધિત ચૂંટણી બોન્ડ યોજનાને પડકારતી અરજી પર સુનાવણી કરી. કોર્ટે આ કેસની સુનાવણી માટે 30 ઓક્ટોબરની તારીખ નક્કી કરી છે. તે જ સમયે, કોર્ટે આ મામલો પાંચ જજોની બંધારણીય બેંચને મોકલી દીધો છે.

રાજકીય પક્ષોને રૂ. 12,000 કરોડ ચૂકવાયાઃ અરજીકર્તા

ચીફ જસ્ટિસ ડીવાય ચંદ્રચુડ અને જસ્ટિસ જેબી પારડીવાલા અને મનોજ મિશ્રાની બેન્ચે કહ્યું કે રાજકીય પક્ષોના ફંડિંગ સંબંધિત આ મામલો મોટી બેંચને મોકલવામાં આવે તે જરૂરી છે.

જણાવી દઈએ કે પીઆઈએલ અરજીકર્તાઓમાંથી એકે માર્ચમાં કહ્યું હતું કે અત્યાર સુધી ઈલેક્ટોરલ બોન્ડ દ્વારા રાજકીય પક્ષોને 12,000 કરોડ રૂપિયા ચૂકવવામાં આવ્યા છે અને બે તૃતીયાંશ રકમ કોઈ મોટી રાજકીય પાર્ટીને ગઈ છે.

લોકસભાની ચૂંટણી પહેલા આ યોજનાની ન્યાયિક તપાસ જરૂરીઃ પ્રશાંત ભૂષણ
થોડા દિવસો પહેલા સુપ્રીમ કોર્ટમાં આ મામલે વકીલ પ્રશાંત ભૂષણે દલીલ કરી હતી કે 2024ની સામાન્ય ચૂંટણીઓ માટે આ યોજના શરૂ કરતા પહેલા તેની ન્યાયિક તપાસ જરૂરી છે.

એનજીઓ એસોસિયેશન ફોર ડેમોક્રેટિક રિફોર્મ્સ (એડીઆર) વતી હાજર રહેલા પ્રશાંત ભૂષણે કહ્યું હતું કે ચૂંટણી બોન્ડ દ્વારા અજાણ્યા સ્ત્રોતોમાંથી ભંડોળ ભ્રષ્ટાચારને પ્રોત્સાહન આપે છે અને ભ્રષ્ટાચાર મુક્ત દેશમાં નાગરિકોના રહેવાના અધિકારનું ઉલ્લંઘન કરે છે. આ બંધારણની કલમ 21નું ઉલ્લંઘન છે.