શ્રી સમેદ શિખરજીને લઈને જૈન સમાજ રસ્તા પર ઉતરી આવ્યો, ગુજરાતના મંદિરમાં તોડફોડથી સમાજ ગુસ્સામાં

ઝારખંડ સરકારે તાજેતરમાં ‘શ્રી સમ્મેદ શિખરજી’ને પ્રવાસન સ્થળ તરીકે જાહેર કર્યું છે. આ નિર્ણયના વિરોધમાં જૈન સમાજના લોકો રસ્તા પર ઉતરી આવ્યા છે. ઝારખંડ સરકારના આ નિર્ણયનો રાષ્ટ્રીય રાજધાની દિલ્હી સહિત દેશના અન્ય ભાગોમાં વિરોધ થઈ રહ્યો છે. રવિવારે, જૈન સમુદાયના સભ્યોએ તેમના હાથમાં પ્લેકાર્ડ અને બેનરો સાથે દિલ્હીના ઇન્ડિયા ગેટ પર ઉગ્ર વિરોધ કર્યો. બીજી તરફ મહારાષ્ટ્રની રાજધાની મુંબઈમાં જૈન સમાજના લોકોએ રસ્તા પર ઉતરી વિરોધ પ્રદર્શન કર્યું હતું.

મુંબઈમાં જૈન સમુદાયના લોકોએ ઝારખંડ સરકારના ‘શ્રી સમ્મેદ શિખરજી’ને પ્રવાસન સ્થળ તરીકે જાહેર કરવાના નિર્ણય સામે અને ગુજરાતના પાલિતાણામાં મંદિરની તોડફોડ સામે વિરોધ કર્યો. આ પ્રદર્શનમાં જૈન સમાજના સેંકડો લોકોએ ભાગ લીધો હતો. આ દરમિયાન તેમણે હાથમાં પ્લેકાર્ડ અને ધ્વજ સાથે ફૂટ માર્ચ પણ કાઢી હતી.

દેશભરમાં જૈન સમાજના લાખો લોકોએ પ્રદર્શન કર્યું

વિરોધમાં સામેલ મહારાષ્ટ્રના મંત્રી મંગલ પ્રભાત લોઢાએ કહ્યું કે અમે પાલિતાણામાં મંદિર તોડી પાડવાનો અને ઝારખંડ સરકારના નિર્ણયનો વિરોધ કરી રહ્યા છીએ. ગુજરાત સરકારે પગલાં લીધાં છે પરંતુ અમે તેમની (જેમણે મંદિરમાં તોડફોડ કરી) સામે કડક પગલાં લેવા માંગીએ છીએ. આ સાથે તેમણે કહ્યું કે આજે દેશભરમાં 5 લાખથી વધુ લોકો રસ્તા પર છે.

નાશિકમાં શાંતિપૂર્ણ વિરોધ પ્રદર્શન

બીજી તરફ મહારાષ્ટ્રના નાસિક શહેરમાં શનિવારે જૈન સમુદાયે શાંતિપૂર્ણ વિરોધ પ્રદર્શન કર્યું હતું. છેલ્લા 10 દિવસમાં બીજી વખત આ વિરોધ પ્રદર્શન કરવામાં આવ્યું હતું. ઝારખંડના ગિરિડીહ જિલ્લામાં આવેલ પારસનાથ ટેકરી, જેને ‘સમ્મેદ શિખર’ તરીકે પણ ઓળખવામાં આવે છે. ઝારખંડ સરકારે તેને પ્રવાસન સ્થળ તરીકે જાહેર કર્યું છે. ઝારખંડ સરકારના આ નિર્ણય સામે જૈન સમુદાય પોતાનો વિરોધ નોંધાવી રહ્યો છે.

દિગંબર જૈન ગ્લોબલ મહાસભાની યુવા પાંખના રાષ્ટ્રીય અધ્યક્ષ પારસ લોહરાએ જણાવ્યું હતું કે અન્ય સભ્યોની હાજરીમાં શહેરના અશોક સ્તંભ વિસ્તારમાં વિરોધના ચિહ્ન તરીકે સમુદાયના નવ લોકોએ તેમના માથા મુંડ્યા હતા. આપણા સમુદાયના સભ્યો દ્વારા દેશભરના અનેક શહેરોમાં આવા આંદોલનો કરવામાં આવ્યા છે. જ્યાં સુધી ઝારખંડ સરકાર આ મુદ્દે પોતાનો નિર્ણય પાછો નહીં ખેંચે ત્યાં સુધી અમે શાંતિપૂર્ણ આંદોલન ચાલુ રાખીશું.

અગાઉ, 21 ડિસેમ્બર, 2022 ના રોજ, જૈન સમુદાયના વેપારીઓ અને ઉદ્યોગપતિઓએ વિરોધ રૂપે તેમની દુકાનો બપોરે 2 વાગ્યા સુધી બંધ રાખી હતી. સમુદાયના એક પ્રતિનિધિમંડળે નાશિક જિલ્લા વહીવટીતંત્રને એક મેમોરેન્ડમ પણ સુપરત કર્યું હતું.