નોટોના ઢગલે ઢગલા !રીબડામાં ભાગવત કથામાં યોજાયેલા ડાયરામાં એટલા પૈસા ઊડ્યાં કે સ્ટેજ પર નોટોના ઢગલા થયા

• સોમવારે શ્રીમદ ભાગવત કથા મહોત્સવમાં શ્રીકૃષ્ણ જન્મોત્સવ યોજાયો હતો.

• ભાજપના નેતાઓ પર પણ 100 અને 500ની નોટો વરસાદ થયો હતો.

• ગોરધન ધામેલીયા પર લોકોએ રૂપિયાનો વરસાદ કર્યો હતો.

રાજકોટ-ગોંડલ નેશનલ હાઇવે પર રીબડા ગામમાં ભાઈશ્રી રમેશભાઈ ઓઝાની ભાગવત સપ્તાહનું આયોજન કરવામાં આવ્યું છે. જેમાં રાત્રિના સમયે લોકડાયરાનું આયોજન કરવામાં આવ્યું હતું. લોકડાયરામાં કલાકારોએ ગીતો અને ભજનોની રમઝટ બોલવતા લોકો મન મુકીને વરસ્યા હતા. લોકડાયરામાં કોથળા મોઢે રૂપિયા ઉડતા ચારે તરફ રૂપિયા જ રૂપિયા જોવા મળ્યા હતા. તેમજ ભાજપના નેતાઓ પર પણ 100 અને 500ની નોટો વરસાદ થયો હતો. સ્ટેજ અને આસપાસની જગ્યામાં નજર પડે ત્યાં રૂપિયા જ રૂપિયા જોવા મળ્યા હતા.રીબડામાં લોકડાયરામાં કિર્તીદાન ગઢવી, ઓસમાણ મીર, બ્રિજરાજદાન ગઢવી, સાંઈરામ દવે સહિતના કલાકારોએ લોકગીત, ભજન, દેશભક્તિના ગીત, લોકસાહિત્ય પીરસી લોકોને મંત્રમુગ્ધ બનાવ્યા હતા.

બીજી તરફ લોકોએ પણ મન મુકીને રૂપિયાનો વરસાદ કર્યો હતો. એટલા રૂપિયા ઉડ્યા કે સ્ટેજ પર 20, 100 અને 500 રૂપિયાની નોટના થર જામી ગયા હતા. આ લોકડાયરામાં ગુજરાત ભાજપ ઉપાધ્યક્ષ ડો.ભરત બોઘરા, જિલ્લા પંચાયતના પ્રમુખ ભૂપત બોદર અને રાજકોટ ડેરીના ગોરધન ધામેલીયા પર લોકોએ રૂપિયાનો વરસાદ કર્યો હતો.ગોંડલ તાલુકાના રીબડા ગામ ખાતે 26મે સુધી શ્રીમદ ભાગવત કથા મહોત્સવનું આયોજન કરાયું છે. જેમાં વ્યાસપીઠ પરથી રમેશ ઓઝા કથાનું રસપાન કરાવી રહ્યા છે. રીબડા ખાતે મહીરાજ બજરંગબલી ટ્રસ્ટના પ્રણેતા મહિપતસિંહ ભાવુભાબાપુ જાડેજા દ્વારા સમગ્ર આયોજન કરવામાં આવ્યું છે. ભાઈશ્રીની કથાનું શ્રવણ કરવા ગોંડલ અને રાજકોટ આસપાસના ગામડાઓમાંથી મોટી સંખ્યામાં લોકો ઉમટી રહ્યા છે

.આ કથામાં 23મેને સોમવારે શ્રીમદ ભાગવત કથા મહોત્સવમાં શ્રીકૃષ્ણ જન્મોત્સવ યોજાયો હતો. તેમજ આજે મંગળવારે ગોવર્ધન પૂજા અને 25મેને બુધવારના રોજ રૂક્ષ્મણિ વિવાહ પ્રસંગ યોજાશે. રીબડા ખાતે જાડેજા પરિવાર દ્વારા આયોજિત શ્રીમદ ભાગવત કથા મહોત્સવ દરમિયાન સંતવાણી કાર્યક્રમનું આયોજન પણ કરાયું છે. મહીરાજ બજરંગબલી ટ્રસ્ટના પ્રણેતા મહિપતસિંહ ભાવુભાબાપુ જાડેજાની પ્રેરણાથી જાડેજા પરિવાર દ્વારા આયોજિત શ્રીમદ ભાગવત મહોત્સવમાં તમામ ધર્મપ્રેમી જનતાને જાહેર નિમંત્રણ પાઠવવામાં આવ્યું છે.