ઉત્તરાખંડના રૂરકીમાં આજે વહેલી સવારે એક મોટો અકસ્માત થયો છે. અહીં મેંગલોર, રૂરકીના લહાબોલી ગામમાં ઈંટના ભઠ્ઠાની દીવાલ ધરાશાયી થતાં અનેક મજૂરો કાટમાળ નીચે દટાઈ ગયા હતા. આ અકસ્માતમાં પાંચ મજૂરોના મોત થયા છે. મળતી માહિતી મુજબ, લહાબોલી ગામમાં ઈંટના ભઠ્ઠામાં કામ કરતા મજૂરો દિવાલ ધરાશાયી થતાં દટાઈ ગયા હતા. કાટમાળમાંથી કામદારોને બહાર કાઢવાની કામગીરી ચાલી રહી છે.
મળતી માહિતી મુજબ જ્યારે આ અકસ્માત થયો ત્યારે કામદારો ઈંટો પકવવા માટે ભઠ્ઠામાં ઈંટો ભરી રહ્યા હતા. તે જ સમયે ભઠ્ઠાની દિવાલ ધરાશાયી થતાં ત્યાં કામ કરતા કામદારો કાટમાળ નીચે દટાયા હતા. હાલમાં જેસીબી વડે કાટમાળ હટાવીને ફસાયેલા લોકોને બહાર કાઢવામાં આવી રહ્યા છે. અકસ્માતની માહિતી મળતા જ સ્થાનિક વહીવટીતંત્ર અને પોલીસની ટીમ ઘટનાસ્થળે પહોંચી ગઈ હતી. મેડિકલ વિભાગની ટીમ પણ સ્થળ પર હાજર છે.