લદ્દાખે બનાવ્યો ગીનીસ વર્લ્ડ રેકોર્ડ, જામી ગયેલા તળાવ પર યોજાઈ હાફ મેરેથોન

લદ્દાખના કેન્દ્રશાસિત પ્રદેશે 13,862 ફૂટ ઊંચા પેંગોગ સરોવર પર સબ-શૂન્ય તાપમાનમાં તેની પ્રથમ 21 કિમીની રેસનું સફળતાપૂર્વક આયોજન કરીને ઇતિહાસ રચ્યો છે. વિશ્વની સૌથી ઉંચી થીજી ગયેલા સરોવર પર હાફ મેરેથોન તરીકે તેને ગિનીસ વર્લ્ડ રેકોર્ડમાં દાખલ કરવામાં આવી હતી. ભારત અને ચીનની સરહદ પર 700 ચોરસ કિલોમીટરમાં ફેલાયેલા પેંગોગ તળાવનું શિયાળા દરમિયાન તાપમાન માઈનસ 30 ડિગ્રી સેલ્સિયસ હોય છે, જેના કારણે ખારા પાણીનું તળાવ બરફથી થીજી જાય છે.

લાસ્ટ રન અપાયું નામ

લેહ જિલ્લા વિકાસ કમિશનર શ્રીકાંત બાલાસાહેબ સુસેએ જણાવ્યું હતું કે ચાર કલાક લાંબી મેરેથોન સોમવારે લુકુંગથી શરૂ થઈ હતી અને માન ગામમાં સમાપ્ત થઈ હતી. તેમાં ભાગ લેનારા 75 પ્રતિભાગીઓમાંથી કોઈને ઈજા થઈ હોવાના અહેવાલ નથી. લોકોને આબોહવા પરિવર્તન અને હિમાલયને બચાવવાની જરૂરિયાત વિશે યાદ અપાવવા માટે ‘લાસ્ટ રન’ના નામથી તેનું આયોજન કરવામાં આવ્યું હતું.

રેકોર્ડ ગિનિસ બુકમાં નોંધાયો

એડવેન્ચર સ્પોર્ટ્સ ફાઉન્ડેશન ઓફ લદ્દાખ (ASFL) દ્વારા લદ્દાખ ઓટોનોમસ હિલ ડેવલપમેન્ટ કાઉન્સિલ, પર્યટન વિભાગ અને લદ્દાખ અને લેહ જિલ્લા વહીવટીતંત્રના સહયોગથી મેરેથોનનું આયોજન કરવામાં આવ્યું હતું. “પહેલી પેંગોંગ ફ્રોઝન લેક હાફ મેરેથોન હવે સત્તાવાર રીતે ગીનીસ બુક ઓફ વર્લ્ડ રેકોર્ડમાં દાખલ થઈ ગઈ છે,” સુએસે કહ્યું.