મસ્કે લીધો “યુ ટર્ન”! છૂટા કરેલા કર્મચારીઓને નોકરી પર પાછા આવવા વિનંતી કરી

વિશ્વના સૌથી અમીર વ્યક્તિ ઈલોન મસ્ક માત્ર સંપત્તિ માટે જ નહીં પરંતુ અન્ય ઘણા કારણોસર પણ સતત ચર્ચામાં રહે છે. ટ્વિટરની કમાન પોતાના હાથમાં લઈને તેમને ઘણા લોકોની છટણી કરી દીધી હતી પરંતુ હવે મસ્કને કદાચ પોતાની ભૂલનો અહેસાસ થવા લાગ્યો છે. એક અહેવાલ અનુસાર, ટ્વિટરે કેટલાક કર્મચારીઓને નોકરી પર પાછા આવવા વિનંતી કરી છે.

ટ્વિટરમાં આવતાની સાથે જ, ઈલોન મસ્કે પહેલા ભારતીય મૂળના સીઈઓ પરાગ અગ્રવાલ સહિત ત્રણ ટોચના અધિકારીઓની છટણી કરી અને પછી એક પછી એક મોટી છટણી કરી. કંપનીના સમગ્ર બોર્ડને હટાવ્યા બાદ તેમણે શુક્રવારે લગભગ 3700 કર્મચારીઓને નોકરીમાંથી કાઢી મૂક્યા હતા. આટલી મોટી છટણી બાદ હવે તેમને પોતાની ભૂલનો અહેસાસ થઈ રહ્યો છે અને તેમણે યુ-ટર્ન લીધો છે.

માઇક્રોબ્લોગિંગ સાઇટ ટ્વિટરને $44 બિલિયનમાં ખરીદનાર અબજોપતિ ઈલોન મસ્ક છેલ્લા ઘણા દિવસોથી નવા નિયમો અને કર્મચારીઓની છટણીને કારણે ચર્ચામાં છે. ઈલોન મસ્કે તેમના ઓપરેશન ક્લીન હેઠળ ભારતમાં ટ્વિટરની લગભગ આખી ટીમને બહારનો રસ્તો બતાવ્યો હતો. બ્લૂમબર્ગના અહેવાલમાં સૂત્રોના હવાલાથી દાવો કરવામાં આવ્યો છે કે કંપનીએ આકસ્મિક રીતે કેટલાક કર્મચારીઓને કાઢી મૂક્યા હતા, જેમને પાછા આવવા માટે કહેવામાં આવી રહ્યું છે.

ટ્વિટરના નવા બોસ ઈલોન મસ્કે કર્મચારીઓની જબરદસ્ત છટણી બાદ શુક્રવારે ટ્વિટ દ્વારા આનું મોટું કારણ જણાવ્યું હતું. તેમણે કહ્યું હતું કે, ‘જ્યાં સુધી ટ્વિટરના કર્મચારીઓમાં ઘટાડાની વાત છે, કંપની પાસે અન્ય કોઈ વિકલ્પ નથી. ટ્વિટર દરરોજ લગભગ $4 મિલિયન ગુમાવી રહ્યું છે. તેમણે એમ પણ કહ્યું હતું કે કંપનીમાંથી કાઢી મૂકવામાં આવેલા કર્મચારીઓને ત્રણ મહિનાનું સેવરેંસ પેકેજ ઓફર કરવામાં આવ્યું છે, જે કાયદાકીય જવાબદારી કરતાં 50 ટકા વધુ છે.