બ્રહ્માસ્ત્રનું ટ્રેલર થયુ લોન્ચ
પૌરાણિક આધારિત ફિલ્મ છે બ્રહ્માસ્ત્ર
અમિતાભ બચ્ચનના અવાજ અને રણબીર કપૂરની ઝલક સાથે રિલીઝ થયું ટ્રેલર
અયાન મુખર્જીના નિર્દેશનમાં બનેલી પૌરાણિક આધારિત ફિલ્મ ‘બ્રહ્માસ્ત્ર’નું ટ્રેલર રિલીઝ થઈ ગયું છે. અમિતાભ બચ્ચનના અવાજ અને રણબીર કપૂરની ઝલક સાથે શરૂ થયેલું ટ્રેલર, મહાબલી અને તેના હાથમાં રહેલા સર્વશક્તિમાન શસ્ત્રને શોધવાની વાર્તા કહે છે. અયાન મુખર્જી દ્વારા નિર્દેશિત આ ફિલ્મ પ્રેમ, રોમાન્સ, થ્રિલર અને સસ્પેન્સથી ભરપૂર છે. જેમાં શસ્ત્રોના દેવતા ‘બ્રહ્માસ્ત્ર’ની શક્તિઓને સાકાર કરવાનો પ્રયાસ કરવામાં આવ્યો છે.
આલિયા ભટ્ટ અને રણબીર કપૂર ઉપરાંત, આ ફિલ્મના ટ્રેલરમાં સદીના મેગાસ્ટાર અમિતાભ બચ્ચન, દક્ષિણના સુપરસ્ટાર નાગાર્જુન અને જાણીતી અભિનેત્રી મૌની રોયની ઝલક જોવા મળે છે. ટ્રેલર જોઈને અનુમાન લગાવવામાં આવી રહ્યું છે કે ‘બ્રહ્માસ્ત્ર’માં રણબીર કપૂર અને આલિયા ભટ્ટના પાત્રોની વાર્તા પ્રેમથી લઈને બ્રહ્માસ્ત્ર પર યુદ્ધ સુધી જોવા મળશે.ત્રણ ભાગમાં રિલીઝ થનારી ફિલ્મના પહેલા ભાગની વાર્તા શિવા (રણબીર કપૂર) પર કેંદ્રિત છે. શિવા ઈશા (આલિયા ભટ્ટ)ના ગળાડૂબ પ્રેમમાં છે. જોકે, તેમને ખબર પડે છે કે, શિવાનું બ્રહ્માસ્ત્ર સાથે રહસ્યમયી જોડાણ છે ત્યારે ઉથલપાથલ સર્જાય છે. શિવા પાસે એક અજાયબ શક્તિ છે જેને અત્યાર સુધી તે સમજી નહોતો શક્યો અને તે શક્તિ છે આગ.
આ ફિલ્મ દર્શકોને અસ્ત્રોની દુનિયામાં લઈ જશે. આગથી ના દાઝતા શિવાને ખબર પડે છે કે તે પોતે જ અગ્નિ છે અને બ્રહ્માંડના રક્ષક બનવું તેની કિસ્મતમાં લખાયેલું છે. ફિલ્મમાં અમિતાભ બચ્ચન પ્રોફેસર અરવિંદ ચતુર્વેદીના રોલમાં છે જ્યારે નાગાર્જુન અક્કિનેની આર્કિયોલોજીસ્ટના રોલમાં છે. ઉલ્લેખનીય છે કે, ‘બ્રહ્માસ્ત્ર’ ભારતના પહેલા ઓરિજિનલ યુનિવર્સ અસ્ત્રાવર્સની શરૂઆત છે.દમદાર સ્ટાર કાસ્ટ સાથેની આ ફિલ્મ 9 સપ્ટેમ્બર 2022ના રોજ રિલીઝ થવાની છે. ટ્રેલર જોઈને ફેન્સનો ફિલ્મ માટેનો ઉત્સાહ બમણો થઈ ગયો છે અને હવે તેઓ આતુરતાથી ફિલ્મ રિલીઝ થવાની રાહ જોઈ રહ્યા છે. ફિલ્મમાં શાહરૂખ ખાન અને દીપિકા પાદુકોણ પણ મહત્વના રોલમાં જોવા મળશે તેવા અહેવાલો છે. જોકે, હકીકત તો 9 સપ્ટેમ્બરે ફિલ્મ રિલીઝ થયા પછી જ સામે આવશે.