રાજકોટમાં કડાકા ભડાકા સાથે પોણાત્રણ ઇંચ વરસાદ! મવડીની સોસાયટીઓમાં ભરાયા પાણી

• રાજકોટમાં સતત ત્રીજા દિવસે મેઘ મહેર

• મવડી સહીતના વિસ્તારમાં ભરાયા પાણી

• ભારે ગાજવીજ સાથે પોણાત્રણ ઇંચ વરસાદ

રાજકોટમાં આજે સતત ત્રીજા દિવસે મેઘરાજાએ મહેર કરી છે. સવારથી બપોર સુધી અસહ્ય ગરમીને કારણે લોકો અકળાયા હતા. પરંતુ બપોર બાદ વાતાવરણમાં પલ્ટો આવતા કાળા ડિબાંગ વાદળો સાથે આકાશ ઘેરાયું હતું. બાદમાં પ્રચંડ વીજળીના કડાકા ભડાકા સાથે ધોધમાર વરસાદ વરસ્યો હતો. ગરમીમાંથી રાહત મેળવવા ભૂલકાંઓ ઘરમાંથી બહાર નીકળી વરસાદમાં ન્હાવાની મજા માણી હતી. શહેરના મવડીમાં નીચાણવાળી સોસાયટીઓમાં પાણી ભરાતા લોકો પરેશાન બન્યા છે. રાજકોટ ઝોનવાઇઝ વરસાદની વાત કરીએ તો સેન્ટ્રલ રાજકોટમાં પોણો ઇંચ, પશ્ચિમ રાજકોટમાં પોણા ત્રણ ઇંચ અને પૂર્વ રાજકોટમાં અડધો ઇંચ વરસાદ નોંધાયો છે.

રાજકોટમાં ધોધમાર વરસાદથી મનપાની પ્રિ-મોન્સૂનની કામગીરીની પોલ ખુલી ગઈ છે. શહેરના મવડી વિસ્તારમાં ગોઠણસમા પાણી ભરાયા છે તો અમુક સોસાયટીમાં ઘરમાં પાણી ઘૂસી ગયા છે. આથી લોકો હેરાન-પરેશાન બન્યા છે. બીજી તરફ સાધુ વાસવાણી રોડ પર દોઢ-દોઢ ફૂટ પાણી ભરાતા વાહનચાલકો પરેશાન બન્યા હતા. વાહનો બંધ પડતા લોકોએ દોરીને વાહન લઇ જવાની ફજર પડી હતી. આ ઉપરાંત રૈયા રોડ, ધરમનગર વિસ્તારમાં પણ રસ્તા પર દોઢ-દોઢ ફૂટ પાણી ભરાયા હતા.શહેરના 150 ફૂટ રિંગ રોડ પર મવડી ચોક ઓવરબ્રિજ નજીક પાણી ભરાયા છે. આથી ટ્રાફિકજામના દૃશ્યો સામે આવ્યા છે. વાહનચાલકો પરેશાન બન્યા છે. તેમજ બાળકો વરસાદી પાણીમાં ન્હાવાની મજા માણતા નજરે પડ્યા હતા.

જ્યારે પડધરી પંથકમાં આજે સતત બીજા દિવસે ધોધમાર વરસાદ પડતા ખેતરો પાણી પાણી થયા છે. પડધરીનાં ખોડાપીપર, જીવાપર, વિભાણીયા, ખાખરા અને હડમતીયા ગામમાં વાવણીલાયક વરસાદ પડતા ખેડૂતોમાં ખુશીની લાગણી પ્રસરી છે. આવતીકાલે ખેડૂતો વાવણીના શ્રીગણેશ કરશે. રાજકોટના કુચીયાદડ, બેટી, રામપરા, પારેવાળા, બામણબોર, નવાગામ સહિતના ગ્રામ્ય વિસ્તારોમાં ભારે પવન સાથે જોરદાર વરસાદ વરસ્યો હતો. આ સિવાય આજે જસદણ પંથકમાં પણ ગાજવીજ સાથે વરસાદ વરસ્યો હતો.